جالس العشائر العراقية تطالب بفصل عشائري من الحكومة ناصر سعيد

مجالس العشائر العراقية تطالب بفصل عشائري من الحكومة

ناصر سعيد
اجتمعت مجالس العشائر العراقية بجلسة طارئة وعاجلة وحضرها بعض السادة من ابناء النسب الشريف لاطفاء النائرة وكذلك حضر هذه الجلسة شيوخ حوزويين من ذوي اصحاب العمائم السوداء والبيضاء والحمراء الكبيرة والصغيرة لاطفاء الفتنة التي اطلت بعنقها على عراقنا المبتلي بصول اجعابه ....

ومجمل الفتنة ان الحكومة البريطانية اكتشفت بان الاجهزة الكاشفة للمتفجرات كانت فاسدة وغير صالحة للعمل والنشر في عراق المبتلي بصول اجعابه والتي استوردها العراق، علما بان الاجهزة الامنية صمت اسماعنا بجودة هذه الاجهزة وصلاحيتها الفعالة بل ومن باب ليطمئن قلبي عرضت علينا نحن ابناء الشعب بروفا في الاعلام وتحت رعاية القادة والسادة تثبت لنا صلاحية وفعالية هذه الاجهزة ، وكما تعلمون نحن شعب نصدق حتى فسوة المسؤول اذا انطلقت بشعار او كلمة ...
وبعدما تبين الخيط الاسود مثل وجوهنا المصخمة والخيط الابيض مثل وجوه المسؤولين وتبين بفضل عمنا ابو ناجي فساد اجهزة الكشف هنا انبرت عشائرنا المجيدة والسعيدة والرشيدة والتليدة بجلستها الطارئة هذه ...
انبرى الحاج شنون (زعيم احدى العشائر) : ها يخوتي احنة صرنا مضحكة ياهو اليجي يضحك علينا، وراحت ارواح ولدنا ونسوانا بولة بشط ، وما راح نهدأ اذا مايكعد جبيلنا المالكي وحكومته حتى تفصل واحنة من يمنا منطينهم عطوة (علك) شهرين ونص والا بعدها تصير مو خوش ...
انتفض شناع (زعيم عشيرة) : بوية مو بس هاي السالفة اكو شغلة غيرها جبيرة ، لان السالفة اللي حجة بيها محفوظ شنون متعودين عليه ويصير دم وموت بين العرب وهذي بسيطة ، بس تعالوا يا اجاويد وخبروني شني ذنب ولدنا اللي بالجيش والشرطة واحدهم لازم جهاز جنة لعبة مال جهال ويوكف السيارات ويمشي محرن كبل لايلتفت لا يسرى ولايمنة ومن يتعب يكوم يوكف بمجانه ويظل يرفع رجل وينزل رجل محشومين جنهم مطي يزاكط ، بويه ما تكولولي شني فوك دمنا صاروا ولدنا مضحكة ، شنهي فكر المالكي والعبيدي والبولاني يريدون يضحكون العربان علينا ، بوية ترى هاي الشغلة عليها فصل مربع ....
وهنا قام السيد ونزل اعمامته على الكاع وكال بويه عليكم العباس ابو فاضل وهاي رايته راح اشدها ، ولزم وصلة حمرة وشدها وكال شديت راية العباس على كل واحد يكسر العطوة واحنة باجر نروح لمام جلال لانه خير بلكي يطمطم السالفة ترى هو خوش يطمطم ويستر من يريد يستر ويطمطم ، ها اخوتي شتكولون ، فما كان من الجميع الا وقف احتراما لراية العباس وكالوا بويه انت ابن رسول الله وشديت راية العباس جا بعد شنكدر انسوي ، امرنا لله وحتى ترضى علينا بويه فصل الدم جوه الفراش بس فصل المضحكة الضحكوا بيها على ولدنا اللي خلوهم شايلين لعبة مال جهال وماخذين الشارطول بعرض جنهم مخابيل هاي ما ينسكت عليها .....
فشكرهم السيد والسادة والشيوخ وكالوا ها وين الغدا ....

وسنوافيكم بتطور الاحداث