بغداد العروسه ماجد الحلاوي

بغداد العروسه


عروسه بيوم زفتهه
تشوف الفرحه مرسومه اعله شفتهه
والعنين سوده
ومن سواد الليل كحلتهه
وحته الورد منهه ايغار
لو حمرت وجنتهه
شمحله دواغهه
وشمحله بدلتهه
عروسه بيوم زفتهه
يا للاسف ما تممت فرحتهه
ولا كملت سعادتهه
غزوهه وكتلو العريس وغتصبو بكارتهه
تصرخ والخناجر تحز رگبتهه
تصرخ والدماء تسيل
ومحد سمع صرختهه
واللي چان حامیهه حرامیهه
ترکهه بیوم شدتهه
ضم روحه بجحر جرذان
ما همته سمعتهه
ولا همه العده بليل استباحتهه
يخجلتهه
يفشلتهه
يذلتهه
حبلت بالخزي والعار
وتشمتت جارتهه
حبلت والليالي نار
وتعسرت ولادتهه
وتمنت تموت
ولا تعيش بعار وبذله
وحلفت لو يجي المولود
يحرم علي مي دجله
ولا نهر الفرات
ايطهره ويغسله
مكسورت الخاطر ظلت الحله
والفلوجه شبت نار
والبصره الحبيبه اليوم محتله
وبغداد العروسه بيوم زفتهه
غزوهه العده وغتصبو بكارتهه
حبلت والحمل مذموم
حبلت والحمل مشؤوم
وبعد الحمل جابت توم
واحد صار ارهابي
ويعلن حرب عالشيعه
يتاجر---- يشتري
الانسان ويبيعه
يكتل—يذبح—ايفجر
يريد الوادم اتطيعه
والثاني طمع بالمال والدوله
سلك درب الخيانه
وباع كل اهله
وميهمه العراق يضيع
يتگطع الف وصله
صبر ايوب يا بغداد
خل نصبر عله العله
هذوله اثنينهم يرحون
ما واحد عراقي اصله
والحر الشريف الگال
اني ابن الفرات وطينته ومايه
وبعروگي احسه اويه النبض دجله
والحر الشريف الگال
كلنه اخوان لا شيعه ولاسنه
ولا كرد اوعرب والباقيه القله
هذوله احنه عراقيين
وهاذه عراقنه كله
امنه احرار ولدتنه
ابد ما نقبل الذله
باچر ترجع وتنعاد
ونغني احنه بالاعياد
منصوره يا بغداد
ونعيش كلنه احرار
منصوره يا بغداد
لا ظلم واستعمار
منصوره يا بغداد
لا طاغيه وجلاد
منصوره يابغداد
منصوره يابغداد


مع تحيات ماجد الحلاوي