هدوة ليل ابو ماجد الزيادي

هدوة ليل
********
أغمض العين بلكت صورتك تنساب حدر الجفن مثل المیل
وضل أرجاك لو بالطيف *** هالبت تحس بيّه اتگلّب بهالليل
أريد أحلم بكل مابيك *** وملي العين منّك وشم ريحك حيل
تدري الروح تشتم ريحتك بالطيف *** گطرت مسچ مخلوطه ويحبّة هيل
وضل نشوان بكتارك *** وصك أعيوني أعلى الطيف لايفلت بهدوة ليل
ورد بعمري سبع أسنين *** واتحرّاك *** لن مابيك ذاك الحيل
وارجع بعد حفنه أسنين وافطن ليك ** لن عللتك منّك بيك **

ولن چتّالك اليحميك
ولن ربعك اللي چانت تزامط بيك ** صاحت غاب نجم سهيل
وفز لن طيفك أگبالي * ووهوس بيك * چنّك ناوي اعلى ارحيل
وارد احلم وغط بالنّوم ** ولنّك طايح بميدان تنداس بحوافر خيل
وچنّك موش ذاك انته *** وچن رسمك مطوّف ويا جَرف السيل
وچن بسماك موش أغيوم مزنة صيف ** سواد الغيم چنّه أتگول جلد الفيل
شهالطيف اليهد الحيل * حوافر خيل * جَرف السيل * نوادب ماتنام الليل
والجيران كلها اتصيح اجاك الويل
وانته الچنت حوت الماي * النواهش ماچله أطرافك * باجيّك توالي الذيل
هم تسجيل *** وفز واقرأ الصمد ترتيل
گعدت اگعود من نومي وصحت ياحيف *** ذاك انته التلاوي السيف
عندك عيد من يحضر ابيّتك ضيف ** تالي أصبحت للأنذال مسرح كيف
ألف ياحيف *** وضليت بتوالي الليل اگل للروح بلكت طيف
وآخر چلمت اليقضه البگت بلساني ألف ياحيف *** ألف ياحيف ** ألف ياحيف

ابو ماجد الزيادي