أيكولون السياسة فنون للشاعر عباس جيجان

________________________________________
أيكولون السياسة فنون
كلما تنقفل لازم تفكلك باب
بس أحنا سياستنا ذبح وارهاب من الباب للمحراب
فضائيات عدنا بكد عواء الذيب
طاحولك علينه بين طيب وطاب
وتيارات عدنه بكد نفوس الصين
ومن كثر الكصب والبردي عدنه احزاب
ياهو الي تلزمه ايكول آنا الزين وغيري محيل وجذاب
باعوا للوطن تفصيخ بالمزاد..حمل شيل غير حساب
اهو مو مال ابوهم حتى ما أيبعوااااا كل الي اجو اغراب
اخوي الكردي ايطالب رايد استقلال
وحقه ابن الجنوب ايريدله طلاب
وابن بغداد عايش بس على التفخيخ والتفجير يذبح ركبة الطلاب
ما عاد اسمك يا عراق عراق
ايسمونك وطن ارهاب
مايقبل علي سنة عمر تنعاف
ولاشيعة علي ينكرها ابن خطاب
من الله خلقنه بهالوطن خوان.......
سنة وشيعة فد كتاب
ماأكلك تصاهر هذا حجي اليوم
بس دقق علينه وراجع الانساب
كلنا من ظهر واحد نسل عدنان لو قحطان
دين اهلي سمح ومشرع الابواب
سوونا طوايف ناس تاكل ناس
وسووها شريعة غاب
مو هذي ثقافتنا وحق الله
هذي فكرة الاجناب
اذا دستورنا ماضيته جلبة بوش
عليمن بعد وألمن تجتمع جمعية النواب
اصحوا يا عراقيين كافي النوم
مو بأطول نخلكم حطب الحطاب
باعوكم زمر من حيث لاتدرون
وأنتوا على النوايب لافين نكاب
وين اهل السماوة وثورة العشرين؟؟؟؟؟؟؟؟؟؟
وين اهل العمارة وبصرة السياب؟؟؟؟؟؟؟؟؟
وين اهل الناصرية البيهم النخوات؟؟؟؟؟؟؟؟؟؟
وين اهل النجف كوام داحي الباب؟؟؟؟؟؟؟؟؟؟
وين اهل كربلاء انصار ابو السجاد؟؟؟؟؟؟؟؟
وين اهل بابل حلة الاطياب؟؟؟؟؟؟؟؟؟؟؟؟؟؟؟
وين اهل الديوانية وربعة الشعلان؟؟؟؟؟؟؟؟
وين اهل الخيول الي لوتألها ركاب؟؟؟؟؟؟؟؟؟
وين اهالي الكوت واهل الحي؟؟؟؟؟؟؟؟؟؟؟؟؟؟
وين اهالي ديالى والمشخاب؟؟؟؟؟؟؟؟؟؟؟؟؟؟؟
وين اهل الرمادي وفلوجة الشجعان؟؟؟؟؟؟؟؟؟؟؟
وين اهل سامراء واهل تكريت وشرقاط؟؟؟؟؟؟؟؟؟؟؟؟
جنتوا الرووس يا وسفة صفيتوا أذناب
لا سنة ولاشيعة العراق اسلام
والاسلام دين اهل الكرامة وغيرة الاجداد
مكوناتك ياعراق موش هواي
تركمان وكلدوآشور وعرب واكراد
تفدرلتواا والفدرلاكم فدرلاه البين
جنتاو جمع صرتوا افراد
اذا عن النفط تحجون عمي النفط عدكم صار
والي بي زود يوصل عكرب العداد
واذا عن الصنم تحجون عمي الصنم طاح وراح
ونحاسه انباع بالمزاد
واذا عن الكراسي فالكراسي اهواي بالخضراء
واليكعد عليها كون ابن غيرة وشرف واجواد
على ياملة ذبحتوا الناس كل الناس؟؟؟؟؟؟؟؟؟
واطفال العراق ميتمة وتنكاد
اريد احجي حجايتي لله والتاريخ
ولو مبعد عليهم واهلي عني بعاد
لابصرة ولااربيل يبقى اسم العراق عراق
وتبقى العاصمة بغــــــــــــــــــــــداد



الشاعرعباس جيجان