خل بشرف نعمل سيد احمد العباسي

كتبت هذه القصيدة واسمها : ( خل بشرف نعمل ) .
شوكت واحدنه للثاني يتحمـــــــــــــــــل
وشوكت من قلوبنه لهذا الوطن نعمـــــل
وننسه الماضي ونبدي من جديــــــــــــد
ونخلي وطنه بس هو بالدول اجمــــــــل
نتحد من اجل الوطن وكل العراقييــــــن
ويحتاج شوي نفكر وللوضع نتأمــــــــل
ونصفي كل الدين ونلغي الانانيـــــــــات
ونلم الشمل من اجل الشهيد ودم المرمـل
لان يحتاج من عدنه العراق عيــــــــون
يحتاج نغير النظره ومانطعن الغير بسل
محاصصه منريد ولابعثي بالدم غــــاط
ولايصَدر قرار وينقضه والنوب يتأجــل
من اجل الشهيد ويتامه العراقييـــــــــــن
ومن اجل كل طفل نرسم كون مستقبـــل
ومن اجل كل قطرة دمايه نتفق من جديد
نضحي لعيون الوطن ويصير لازم حـل
كافي نتهم ونثير الفتن ونشعل النيــــران
وماعدنه اتفاق بمؤتمر يصير وبمحفـــل
وخل نتفق من اليوم وكافي تهديــــــدات
وكافي نهدم بالحكومه ويوميه الهه نــذل
وكون نحاسب الجيران لأجل العراقييــن
ونفضح كل الدول ونحاسبهم ونســــــأل
نطلب محكمه ونحاكم من سَبب التفجيــر
ونكسر خشم كل من سيفه علينه يســـــل
نلجأ للمحكمه ومانترك الموضـــــــــوع
نحاسب كل دوله فجرت ولدمنه هي تحل
احنه عدنه تسجيلات وافلام محفوظـــات
وعدنه كل شي موثق ومحفوظ ومسجــل
ولازم نركع اعداء العراقييـــــــــــــــــن
ونخليهم ارانب واحدهم يرجف ويجفـــل
اذا يسمع بالعراق يخاف ونأدبه من اليوم
ونتوبه بعد ارهابي للوطن ميخليه يتسلـل
عله شرط السياسي متصير عنده اطماع
ومايحقد عله اخوانه وبصدره يحمل غل
وشلون انت سياسي وبالوطن معــروف
تفكر بكرسي الوزاره وبيه عقلك مجنكل
الوطن خل يصير بعيونكم ياسياسييــــن
خل يتحمل واحدنه الثاني ومنه مايزعـل
خل نتصافح من اجل كل العراقييـــــــن
وخل نبني الوطن ونحترمه ونبجــــــــل
شبعنه من سنين وعود ونختلف بالتقييـم
ونختلف بالاراء وعالاحزاب والمُحـتـل
والعدوان يتفرجون ونخسر بكل يـــــوم
وهذا أكبر غلط ولازم هالخطأ ينحَـــــل
خل بشرف نعمل ولانتحسس من الغيــر
ونسند الحكومه يكون واليعمَــــــــــــــل
والفاسد نفضحه وكون نكشــف الاوراق
نكص جناح من يبوك وكل فاسد وارول
كافي ننتقد وقصدنه نجرح المســــــؤول
لان بلا هدف وبس نبجي ونلطم ونكـزل
ننتقص احنه من كل واحد شريف اطباع
وخطأ بالكوه منه نأخذ منصبه ونعــــزل
اذا مو كلنه نتحد من اجل كل النـــــــاس
ونخدم الوطن ونضحي وابد مانبخــــــل
مانرجه خير بكل واحد ولاجيـــــــــران
والبيه زود يعمل للوطن ومن الغير ليقلل
سيد احمد العباسي