قصيدة عمو بابا فالح حسون الدراجي

قصيدة عمو بابا
















----------------

فالح حسون الدراجي

كاليفورنيا

falehaldaragi@yahoo.com

من كَالوا مِتِت ما صدكَيت الكَول ... ولا حتى إفتراض الخبر أفترضه

كَلي أشلون أصدكَ بيك أنت تموت .. وشلون أقتنع بالخبر وآنه أرضه

إذا حتى المنايا إعترضن إنت تموت.. وأولهن مِنيتك أجت معترضَّه؟

صحيح الموت حق وإحنه كلنه نموت..ولسيوف المنايا الدنيا مِتعرضَه

وصحيح الموت حَيَّه وماتميِّزالصوت .. ولاتعرف زغير إجبير بالعضَّه

بس إنت جبل ياعمو موأي صوت..جبل رغم الزلازل ماخِسَف بَرضَه

وكنت مثل البحر ياعمو من تغتاظ .. من يجرأ يزعل البحر ويغيضَّه؟

شهم فارس عنيد إتكَود ماتنكَاد .. ورآيك عالطغاة القاسية تفرضَّه

مثل ريح البوادي .. شلون جا تنكَاد .. من يكَدر يلم الريح ويكظه؟

باعوك أشكثر بس إنت ماتنباع .. من يشلع عِرِكَ مترين حدر أرضه؟

وذلوَّك أشكثر بس إنت ما ذليت .. لأن إنت العراق بمهجته ونبضه

وإذا إنت العراق شلون بعد تموت .. شيموِّت العراق وياهو اليمَرضَه؟

وحق سيف الحسين وسيف ذوالفقار ..وكل سيف اليرِّد الظلم ويرفضَه

وحق صَلب المسيح ونهضة الأحرار.. ومن صَلب المسيح إنطلقت النهضة

وحق نزف العراق ودمه سال أنهار ..ومن جيل إعلى جيل إجروحنا إتعوضَّه

وحق كلمن صعد مرجوحة الأبطال .. ولا وسَّخ ضميره ولا لطخ عَرضَه

وحق دمعة فلاح الوكَعت لبشار 1.. ومن دَمعَه الجفن لليوم يتوضَّه

وحق والد فراس وجرحه يلهب نار 2.. وبكَصته الجرح ليهسَّه يتشظَّه

وحق كاظم وأخوته ودم جَواد الراح 3.. وما باع الوطن بالذهب والفضَّه

من يوم المشيت وسافرت لليوم .. ونفوُس الناس من فركَاك ممتعضه

مو بس البشر ياعمو متمرضين .. ثق حتى الشمس بجفاك متمرضَّه

مدرستك حزينة إمسَددَّة البيبان .. وتلاميذك على الأبواب مكتظه

الملاعب والنخل والليل والبارات .. وكل رغبة بحياتك تشتعل ومضَه

مو لَنَك مُدرب .. كم مدرب راح .. ولا لاعب كبير .. اللاعب إنعوضَّه

بس إنت وطن مايرهم التعويض ... من يكَدر يبادل وطن ويعوضَّه؟!!



** ** ** **

لأن إنت عراقي من القدم للراس .. ولجروح العراق تظل جرح دامي

ولأن إنت الأصل، وإنت الحفرت الساس .. وآشورك جذر لخوالي وأعمامي

ولأن يومك عراقي، وكلشي بيه ينباس .. ومن غير العراق شيسوَّن أيامي؟ ولأن إنت عراقي وتاج فوكَ الراس ... لا عَجمي العِلاه، ولا خَشم شامي .

ولأن روحك رقيقة وأرَق من الياس... وأحلامك شواطي لدجلة أحلامي ولأن دمنه عراقي وكلنه فد أنفاس .. ومن دون العراق إنظل نهر ظامي

ولأن كَلبك كبير يشيل كل الناس .. مسيحي وصابئي وأيزِّيدي وإسلامي

ولأن إنت شريف وما أخذت الكاس 4.. من أيد الزنيم .. القاتل .. الدامي

كَلت أكتب قصيدة وبيها أعزي الناس .. وكَبل الناس أعزي إجروحي وآلامي

وكَبل جمرالجكَاير.. وإشتعال الكاس .. إشتعَل بيَّه الشعِر من أخمصي لهامي

كتبتني القصيدة .. وقسَم بالعباس .. مو آني إكتبتها بوَحيِّي وإلهامي

طبُع مَرأة القصيدة، وبعد أرق إحساس .. يفرفحها الجمال الباذخ السامي

ولأن عمو جميل وحِسنَه ماينقاس .. أجت كَبلي القصيدة ومشت كَدامي

نعم عمو جميل من القدم للراس .. حتى اللكنة حلوة بحلكَ أبو سامي!!

--------------------------------------------------

ألقيت في الحفل التأبيني الذي أقيم في إستذكار الراحل الكبير

عمو بابا في مدينة ديترويت ..